Hesab edək ki, 4 fərqli ölkənin hər birinin 3 şəhərinin əhalisinin sayı olan siyahımız var. Və biz hər bir ölkənin əhalisinin ümumi sayını hesablamaq istəyirik.
SUM funksiyasından istifadə edərək hər bir ölkə əhalisini ayrı-ayrılıqda hesablaya bilərik, lakin bunun çox daha qısa və effektiv yolunu öyrənəcəyik.
Bunun üçün öncə formullarımızı daxil edəcəyimiz bütün boş xanaları seçməliyik. Atacağımız addımlar aşağıdakı kimi olacaqdır:
- İlk boşluq olan xanadan etibarən bütün siyahı seçilir
- Home >> Editing >> Find & Select >> Go To Special >> Blanks klikənir
Excel avtomatik o aralıqda yer alan bütün boş xanaları seçmiş olacaq.
Daha sonra funksiya sətirində formulumuzu daxil etməyə başlaya bilərik. Aşağıdakı gif faylında bütün addımlar açıq bir şəkildə göstərilmişdir.
- Əvvəla, formul daxil etmək istədiyimiz bütün xanaların seçilmiş olduğundan əmin olmalıyıq.
- Yuxarıda funksiya sətirinə (fx) gələrək istədiyimiz formulu daxil edirik. Misalımızda, bu, adi SUM funksiyasıdır.
- Formulu yazıb bitirdikdən sonra Enter yox, Ctrl + Enter basırıq. Bu hissəsi çox önəmlidir. Təkcə Enter bassaq istədiyimiz nəticəni əldə edə bilməyəcəyik.
Bu qədər bəsit. Sadəcə bir nyuansı da unutmayın. Bizdə siyahıda hər ölkəyə aid 3 şəhər var idi, amma ölkəyə aid şəhərlərin sayı dəyişsə, formul ilk daxil etdiyimiz xana sayına uyğun hesablama aparacaq. Məsələn, biz funksiya sətirində C4:C6 aralığını göstərdiyimiz üçün, Excel hər zaman 3 ədəd komponenti cəmləyəcək. Bu da şəhər sayıları 3-dən fərqli olan ölkələrdə yanlış nəticələr verəcək. Amma əgər hər bir kateqoriyada komponent sayları eynidirsə, bu yoldan istifadə edə bilərsiniz.
Uğurlar!
